ქვეყანაში შემოსვლის პირობები და ვიზები
ინფორმაცია საქართველოს ვიზის შესახებ
იმ შემთხვევავში, თუ დაგეგმილი გაქვთ საქართველოში ჩამოსვლა სწავლის ან მუშაობის მიზნით, ქვეყანაში შემოსვლამდე საჭიროა შესაბამისი კატეგორიის ვიზის აღება, რომელიც გაიცემა სამგზავრო დოკუმენტში ვიზის ბლანკის განთავსებით ან ელექტრონულად (ელექტრონული ვიზა). აღსანიშნავია, რომ ზოგიერთი ქვეყნის მოქალაქეს, საქართველოში შემოსვლა ვიზის გარეშე შეუძლია.
ღილაკი - „მესაჭიროება თუ არა ვიზა“ არის ყველაზე მარტივი და სწრაფი გზა უცხო ქვეყნის მოქალაქისათვის, გაარკვიოს ესაჭიროება თუ არა ვიზა საქართველოში შემოსასვლელად, დასარჩენად ან სატრანზიტო გადაადგილებისათვის.
სავიზო განაცხადის წარდგენამდე, უნდა აირჩიოთ საქართველოში მოგზაურობის სწორი დანიშნულება, რათა მიიღოთ გადაწყვეტილება ვიზის სასურველი კატეგორიის (ბინადრობის სტატუსის) შერჩევაზე. ვიზის კატეგორიები განსზაღვრულია საქართველოს საიმიგრაციო კანონით და განსხვავდება ქვეყანაში მგზავრობის დანიშნულების მიხედვით. საქართველოს ვიზა იყოფა შემდეგ კატეგორიებად:
- დიპლომატიური (A კატეგორია)
- სპეციალური (B კატეგორია)
- ორდინალური (C კატეგორია)
- საიმიგრაციო (D კატეგორია)
- ტრანზიტული (T კატეგორია)
საქართველოში ვიზიტის მიზნიდან გამომდინარე, ვიზის მიღება შესაძლებელია, როგორც ელექტრონული განაცხადის რეგისტრაციის, ასევე ელექტრონული ვიზის პორტალის მეშვეობით. ელექტრონული ვიზის პორტალი – უცხო ქვეყნის მოქალაქისთვის საქართველოს ტერიტორიაზე მოკლევადიანი მიზნით შემოსვლისა და მოგზაურობის ყველაზე მარტივი გზაა. თქვენ გაქვთ შესაძლებლობა აიღოთ მოკლევადიანი ვიზა, საქართველოს საელჩოში ან საკონსულო ოფისში ვიზიტის გარეშე.
ელექტრონულიგანაცხადისრეგისტრაციის სისტემის მეშვეობით, თქვენ შეგიძლიათ განაცხადი გააკეთოთ საქართველოს ვიზის ნებისმიერი კატეგორიის შესახებ. სისტემა საშუალებას გაძლევთ, ელექტრონული ფორმით შეივსოთ განაცხადი „საკონსულო მომსახურების მიღების ფორმის და დროის განსაზღვრის თაობაზე“. ელექტრონული ვიზა პორტალისგან განსხვავებით, ელექტრონული განაცხადის რეგისტრაციის მეშვეობით თქვენ ვალდებული ხართ ვიზის გამცემ ორგანოს ხელმოწერილი სავიზო განაცხადი და ვიზის გასაცემად საჭირო ყველა სხვა დოკუმენტი წარუდგინოთ მატერიალური ფორმით, ვიზის გამცემ ორგანოში ან დოკუმენტების მიღებაზე უფლებამოსილ სხვა ორგანოში უშუალოდ წარდგენის გზით, ხოლო დიპლომატიური და სპეციალური ვიზების შემთხვევაში − ვიზის გამცემ ორგანოში უშუალოდ ან ფოსტის მეშვეობით წარდგენის გზით.
თქვენ მიერ წარდგენილი დოკუმენტაციისა და ვიზის გამცემი ორგანოს მიერ მოპოვებული მასალის საფუძველზე, თავად ვიზის გამცემი ორგანო იღებს გადაწყვეტილებას ვიზის გაცემის ან არგაცემის თაობაზე. ვიზის გაცემის შესახებ გადაწყვეტილება მიიღება სავიზო განაცხადის წარდგენიდან:
- მოკლევადიანი ვიზა - 10 კალენდარული დღის ვადაში
- მოკლევადიანი ვიზა (e-VISA PORTAL-ის მეშვეობით) – 5 სამუშაო დღის ვადაში
- გრძელვადიანი ვიზა – 30 კალენდარული დღის ვადაში
- D5 კატეგორიის საიმიგრაციო ვიზა – 10 კალენდარული დღის ვადაში
- მეტი ინფორმაცია იხილეთ ბმულზე